Апазыцыйны лідэр Армэніі Нікол Пашыньян заклікаў армянаў працягваць выходзіць на акцыі пратэсту ад 11:00 25 красавіка і давесьці да завяршэньня «негвалтоўную, аксамітную, народную рэвалюцыю».
Паводле кіраўніка партыі «Грамадзянская дамова» Нікола Пашыньяна, улады цяпер спрабуюць выкарыстаць адстаўку Сэржа Саргсьяна (той сышоў з пасады пасьля 11 дзён масавых пратэстаў) для захаваньня ўлады кіроўнай Рэспубліканскай партыі.
Днём раней Пашыньян на прэс-канфэрэнцыі заявіў, што заплянаваныя перамовы з выканаўцам абавязкаў прэм’ер-міністра Карэнам Карапэт’янам (ён жа быў прэм’ерам, калі Саргсьян быў прэзыдэнтам) не адбудуцца. Ён таксама казаў, што ніхто з Рэспубліканскай партыі ня можа быць кандыдатам у прэм’еры, у тыі ліку Карапэт’ян, нават калі выйдзе з партыі. Адразу пасьля адстаўкі Саргсьяна ён заяўляў, што прэм’ерам павінны выбраць «прадстаўніка народу».
Хто такі Нікол Пашыньян
Карапэт’ян жа тлумачыў, што Пашыньян у аднабаковым парадку высунуў патрабаваньні па перамовах: толькі з канкрэтным сьпісам людзей, толькі вакол выбраных ім тэмаў. А гэта, мяркуе ён, «не перамовы ці дыялёг, а выключна агучваньне свайго пункту гледжаньня». Але ён дапусьціў перамовы ў іншым фармаце і нават магчымасьць датэрміновых парлямэнцкіх выбараў.
Тым часам армяне ўжо пасьпелі адсьвяткаваць перамогу, 24 красавіка спантаннай талакой прыбралі плошчы і вуліцы, дзе ішлі пратэсты.
