РАНКАМ...
...з сонцам, надвячоркам з дажджом. Тэмпэратура: 8 — 18 С.
НЕ ПРАХОДЗЬЦЕ МІМА:
У паб-клюбе "Графіці" выступае гурт "Адыс Абэба", які выконвае музыку, інсьпіраваную рытмамі Афрыкі.
ТАМ ДЗЕ НАС НЯМА:
У Брусэлі пачынаецца двухдзённы саміт Эўразьвязу.
У Маскве пачынаецца міжнародны кінафэстываль.
На футбольным чэмпіянаце сьвету ў Паўднёва-Афрыканскай Рэспубліцы Францыя гуляе з Мэксыкай, Грэцыя зь Нігерыяй і Аргентына з Паўднёвай Карэяй.
ТАКСАМА Ў ГЭТЫ ДЗЕНЬ:
У 1793 ў Горадні пачаўся апошні сойм Рэчы Паспалітай, які быў скліканы, каб зацьвердзіць другі падзел Рэчы Паспалітай паміж Расеяй і Прусіяй. Фактычна сойм мусіў ухваліць далучэньне беларускіх земляў да Расейскае імпэрыі, што ён і зрабіў, бо спадзяваўся, аддаўшы Беларусь Расеі, не аддаць Польшчу Прусіі. Аднак пазьней, пад націскам Прусіі, сойм згадзіўся і на анэксію польскіх земляў.
У 1905 годзе ў вёсцы Кішчыцы, што ў Чавускім павеце на Магілёўшчыне, адбыўся расстрэл расейскімі войскамі беларускіх сялянаў. У гэты дзень каморнікі і землямеры пачалі праводзіць тут новую мяжу паміж Горацкім і Чавускім паветамі, што ў адначасьсе мусіла стаць мяжою паміж сялянскімі надзеламі і ўладаньнямі абшарнікаў. Сяляне не дазволілі кроіць зямлю на карысьць памешчыкаў. Спробы коннае паліцыі разагнаць сялянаў не далі вынікаў. Расейскія войскі тады адкрылі агонь. У выніку Кішчыцкага расстрэлу былі забітыя 8 сялянаў, цяжка параненыя 15 чалавек. На месцы трагедыі стаіць помнік.
У 1940 пачалася савецкая акупацыя Латвіі і Эстоніі.
У 1944 Ісьляндыя абвяшчае незалежнасьць ад Даніі і становіцца рэспублікай.
ЁСЬЦЬ НАГОДА:
Сусьветны дзень змаганьня з засухай.
МІНУС 365:
Год таму на сайце "Свабоды": "Халодная вада на галовы эўрапейскіх інтэгратараў".
ЦЫТАТЫ НА ПАМЯЦЬ:
Лепш выпіць малако, чым зьесьці карову.
Лепш без абутку, чым бяз кніжак.
Лепш быць панам у хаце, чым слугам у палацы.
Той, хто жыве без самакантролю, памірае бяз гонару.
Шмат заўсёды тужыць па болей.
Насікаўшы ў бот, можна абагрэць нагу, але не надоўга.
Кожнаму чалавеку свае пукі пахнуць.
Ісьляндыя — найлепшае месца пад сонцам.
— ісьляндзкія прымаўкі
