Скаргу блогера Сяргея Ціханоўскага разгледзелі ў Горадзенскім абласным судзе 9 ліпеня. Ён хацеў аспрэчыць 15 сутак арышту, якія яму далі за непадпарадкаваньне міліцыі. Суд скаргу не задаволіў.
УЖЫВУЮ Выбары-2020. Як праходзіць прэзыдэнцкая кампанія падчас пандэміі
Скаргу падаў адвакат Ціханоўскага Андрэй Шчапяткоў. Ён на судзе не прысутнічаў.
Сяргей Ціханоўскі хадайнічаў аб удзеле ў судзе празь відэасувязь, аднак судзьдзя адзначыў, што гэта немагчыма.
У залі падчас суду над Ціханоўскім
«З прычын тэхнічнага характару немагчыма разгледзець», — заявіў судзьдзя Ўладзімер Яўхута.
На мінулым тыдні ў будынку Горадзенскага абласнога суду прайшлі дзевяць судоў па адміністрацыйных справах фігурантаў «справы Ціханоўскага». Падсудныя бралі ўдзел у працэсах зь СІЗА празь відэасувязь.
У судзе
На паседжаньне прыйшлі праваабаронцы, актывісты, журналісты і 8 маладзёнаў спартовага выгляду ў кепках і масках. Жонка Сьвятлана на судзе не прысутнічала. Ранкам ішоў суд над яе мужам у Менску.
ГЛЯДЗІЦЕ ТАКСАМА: «Гэта было трэба толькі яму?» — Сьвятлана Ціханоўская паскардзілася, што яе мужа слаба падтрымліваюцьАдвакат Шчапяткоў у скарзе прасіў апраўдаць ягонага падабароннага.
1 ліпеня суд Ленінскага раёну прызначыў Ціханоўскаму адміністрацыйны арышт на 15 сутак. Прычына — непадпарадкаваньне супрацоўнікам міліцыі Рахунку і Будніку пры затрыманьні на пікеце ў Горадні 29 траўня.
Горадзенскі абласны суд пакінуў скаргу без задавальненьня.
Гэтая публікацыя падрыхтаваная з выкарыстаньнем інфармацыі БелаПАН.
Затрыманьні Ціханоўскага і яго прыхільнікаў. Што трэба ведаць
- Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
- У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
- Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.
- Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся за некалькіх мэтраў ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміла пра крымінальную справу за «гвалт супраць міліцыянтаў».
- На лецішчы Ціханоўскага нібыта знайшлі 900 тысяч даляраў. Жонка мяркуе, грошы маглі падкінуць.
- 14 сьнежня 2021 году Сяргея Ціханоўскага асудзілі на 18 гадоў зьняволеньня, прызнаўшы вінаватым паводле чатырох артыкулаў Крымінальнага кодэксу: ч. 1 арт. 293 (арганізацыя масавых беспарадкаў), ч. 3 арт. 130 (распальваньне сацыяльнай варожасьці); ч. 2 арт. 191 (перашкода працы ЦВК, заяву на яго падала старшыня ЦВК Лідзія Ярмошына), ч. 1 арт. 342 (арганізацыя дзеяньняў, што груба парушаюць грамадзкі парадак).
- Пасьля прысуду Ціханоўскі спачатку трапіў у папраўчую калёнію № 15 Магілёва. Але ў жніўні 2022-га яму ўзмацнілі рэжым і перавялі на 3 гады ў турму № 8 у Жодзіне, дзе зноў судзілі і дадалі яшчэ 1,5 года зьняволеньня за «непадпарадкаваньне патрабаваньням адміністрацыі». Агулам тэрмін зьняволеньня Сяргея Ціханоўскага цяпер складае 19,5 года.
- З сакавіка 2023 году сваякі Сяргея Ціханоўскага не атрымліваюць аніякай інфармацыі ад яго.
- Беларускія праваабаронцы прызналі Ціханоўскага палітычным зьняволеным.
- ПА АБСЭ і Эўрапарлямэнт патрабавалі вызваленьня Ціханоўскага, Статкевіча і іх паплечнікаў.