Беларусь займае чацьвёртае месьца ў сьвеце ў колькасьці журналістаў, якія знаходзяцца ў зьняволеньні, гаворыцца ў штогадовым дакладзе праваабарончай арганізацыі «Рэпартэры без межаў» (RSF).
Паводле БАЖ за кратамі цяпер 35 беларускіх супрацоўнікаў мас-мэдыяў, у тым ліку жураналісты Свабоды Ігар Лосік і Андрэй Кузьнечык.
Найбольшая колькасьць арыштаваных журналістаў у Кітаі (124, у тым ліку 11 — у Ганконгу), Бірме (61), Ізраілі (41), Беларусі (40), Расеі і Віетнаме (па 38), адзначаюць аўтары дакладу.
Усяго, па дадзеных RSF, у турмах па ўсім сьвеце ўтрымліваецца 550 журналістаў — на 7% больш, чым у папярэднім годзе. У 2024 годзе пазбаўленьня волі прысудзілі 72 журналістам, агульны прызначаны тэрмін зьняволеньня перавысіў 250 гадоў.
У дакладзе падкрэсьліваецца, што гвалт над журналістамі, які «часта чыніцца ўрадамі або ўзброенымі групоўкамі пры поўнай беспакаранасьці», патрабуе «неадкладнага адказу». Неабходна «тэрмінова мабілізаваць усе сілы для абароны журналістаў і журналістыкі».
У дакладзе адзначана «трывожная інтэнсыфікацыя нападаў на журналістаў, асабліва ў зонах канфліктаў, дзе адбылася палова забойстваў журналістаў, зарэгістраваных сёлета».
Самым небясьпечным рэгіёнам названы сэктар Газа, дзе за пяць гадоў «загінула найбольшая колькасьць журналістаў пры выкананьні сваіх абавязкаў».
На думку генэральнага дырэктара арганізацыі Тыбо Брутэна, журналістаў у турмы «кінулі рэжымы».
«Гэтыя злачынствы, якія часта арганізуюцца ўрадамі ці ўзброенымі групоўкамі, топчуць міжнароднае права і занадта часта застаюцца беспакаранымі... Мы павінны абараняць тых, хто нас інфармуе, а значыць, абараняць праўду», — падкрэсьліў Брутэн.
Беларусь заняла 167-е месца ў Сусьветным індэксе свабоды прэсы 2024 году, які «Рэпартэры бязь межаў» прадставілі ў траўні. Адзначалася, што «крыжовы паход супраць незалежнай журналістыкі» працягвае Расея (162-е месца), і ў «гэтай зоне з Расеяй супернічаюць толькі дзьве дзяржавы: Беларусь (167-е месца), чый рэжым перасьледуе журналістаў пад маркай барацьбы з „экстрэмізмам“, і Туркмэністан (175-е месца), дзе прэзыдэнт, які мае неабмежаваныя паўнамоцтвы, забараняе любую незалежную інфармацыю».
У індэксе-2023 Беларусь займала 157-е месца, у 2022 годзе — 153-е.
Форум