На цырымонію прыехалі каля 1500 гасьцей, сярод якіх шматлікія сусьветныя лідэры і знакамітасьці, у тым ліку абраны прэзыдэнт ЗША Дональд Трамп, цяперашняя першая лэдзі ЗША Джыл Байдэн, прэзыдэнт Украіны Ўладзімір Зяленскі і брытанскі прынц Ўільям.
Associated Press паведаміла, што перад цырымоніяй прэзыдэнт Францыі Эманюэль Макрон сустрэўся ў прэыздэнцкім палацы з Трампам, а пазьней да гэтай сустрэчы далучыўся Зяленскі. Перад сустрэчай Трамп сказаў, што будзе абмяркоўваць з Макронам сытуацыю ў сьвеце, які «крыху звар’яцеў».
Пасьля сустрэчы Зяленскі назваў яе «добрай і прадуктыўнай» у сваім тэлеграм-канале.
«Прэзыдэнт Трамп, як заўсёды, настроены рашуча. Дзякуй за гэта. Я таксама дзякую прэзыдэнту Макрону за арганізацыю гэтай сустрэчы ў Парыжы.
Гаворка ішла пра наш народ, сытуацыю на полі бою і справядлівы мір для Украіны. Мы ўсе хочам скончыць гэтую вайну як мага хутчэй і справядліва.
Дамовіліся працаваць далей. Мір магчымы, дзякуючы сіле!»
Цырымонію саборы Парыскай Маці Божай вядзе арцыбіскуп Ляран Ульрых. Паколькі ў Парыжы чакаўся моцны вецер, уся цырымонія мае прасьці ўнутры сабору.
У аднаўленьні сабору пасьля пажару 2019 годe бралі ўдзел больш за 1300 будаўнікоў і рамесьнікаў з усяго сьвету. Яны сталі яго першымі ганаровымі гасьцямі на мінулым тыдні.
- Буйны пажар у Нотр-Даме адбыўся 15 красавіка 2019 году. Загарэліся будаўнічыя рыштаваньні на даху сабора. Дакладную прычыну пажару не ўдалося ўстанавіць, аднак вэрсію наўмыснага падпалу сьледзтва выключыла.
- Як мяркуецца, рыштаваньні загарэліся ад кінутага працоўнымі недакурка або ад кароткага замыканьня ў электраправодцы. Дах сабора выгарэў цалкам, быў разбураны шпіль. Пашкоджаньні ўнутры будынка былі нашмат меншыя.
- Зьбіраць сродкі на аднаўленьне сабора пачалі, яшчэ калі пажар ня быў патушаны. Ахвяраваньні з усяго сьвету склалі больш за 840 мільёнаў эўра. Гэтая сума аказалася нават большай, чым каштавала рэстаўрацыя; яе рэшта будзе выкарыстана на далейшую падтрымку будынку.
- Нотр-Дам — сабор Парыскай Маці Божай — галоўны сабор францускай сталіцы і адзін з найбольш вядомых сымбаляў Парыжу і Францыі ў цэлым. Ён быў пабудаваны ў XII стагодзьдзі і з таго часу шматкроць перабудоўваўся. Чакаецца, што цяпер ён будзе штогод прымаць каля 15 мільёнаў наведнікаў.
