Патэцыйная кандыдатка ў прэзыдэнты Святлана Ціханоўская паведаміла Свабодзе, што яна сёньня падасьць скаргі ў ЦВК і МУС на перашкоды ў зборы подпісаў у яе падтрымку і арышт кіраўніка яе ініцыятыўнай групы.
«Яшчэ сёньня ноччу я падала скаргу ў менскую міліцыю, што зьнік Сяргей. Але ранкам мне стала вядома, дзе ён. Я яшчэ сёньня падрыхтую і падам скаргі ў ЦВК і МУС на тое, што маёй ініцыятыўнай групе чыняцца перашкоды ў зборы подпісаў, і затрымалі, я лічу — незаконна, кіраўніка ініцыятыўнай групы.
Па БТ перакруцілі інфармацыю, ачарнілі Сяргея на ўсю краіну. Гэта быў менавіта пікет, законны, па збору подпісаў, а ня мітынг, як там сказалі. Будзем разьбірацца», — пракамэнтавала Святлана.
Яна таксама выступіла са зваротам да прыхільнікаў, дзе выказалася, што цалкам падтрымлівае пазыцыю Сяргея, «як жонка і як кандыдат».
«Ён намагаўся сабраць подпісы як мага хутчэй, бо ведаў, што ў любы момант яго могуць затрымаць. Наша задача — негледзячы ні на што, працягнуць збор подпісаў. Гэта будзе найлепшая падтрымка для Сяргея. Я вас прашу сабраць як мага больш подпісаў, каб мы маглі рухацца далей. Дзякуй вялікі», — сказала патэнцыйная кандыдатка.
Затрыманьні на пікеце Ціханоўскай у Горадні. Што трэба ведаць
- Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
- У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
- Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.
- Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся за некалькіх мэтраў ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміла пра крымінальную справу за «гвалт супраць міліцыянтаў».
- На лецішчы Ціханоўскага нібыта знайшлі 900 тысяч даляраў. Жонка мяркуе, грошы маглі падкінуць.
- 14 сьнежня 2021 году Сяргея Ціханоўскага асудзілі на 18 гадоў зьняволеньня, прызнаўшы вінаватым паводле чатырох артыкулаў Крымінальнага кодэксу: ч. 1 арт. 293 (арганізацыя масавых беспарадкаў), ч. 3 арт. 130 (распальваньне сацыяльнай варожасьці); ч. 2 арт. 191 (перашкода працы ЦВК, заяву на яго падала старшыня ЦВК Лідзія Ярмошына), ч. 1 арт. 342 (арганізацыя дзеяньняў, што груба парушаюць грамадзкі парадак).
- Пасьля прысуду Ціханоўскі спачатку трапіў у папраўчую калёнію № 15 Магілёва. Але ў жніўні 2022-га яму ўзмацнілі рэжым і перавялі на 3 гады ў турму № 8 у Жодзіне, дзе зноў судзілі і дадалі яшчэ 1,5 года зьняволеньня за «непадпарадкаваньне патрабаваньням адміністрацыі». Агулам тэрмін зьняволеньня Сяргея Ціханоўскага цяпер складае 19,5 года.
- З сакавіка 2023 году сваякі Сяргея Ціханоўскага не атрымліваюць аніякай інфармацыі ад яго.
- Беларускія праваабаронцы прызналі Ціханоўскага палітычным зьняволеным.
- ПА АБСЭ і Эўрапарлямэнт патрабавалі вызваленьня Ціханоўскага, Статкевіча і іх паплечнікаў.
