Губэрнатар Маскоўскай вобласьці Андрэй Вараб’ёў паведаміў, што ў Нара-Фамінскай гарадзкой акрузе зьбілі два бесьпілётнікі, якія нібыта накіроўваліся на вайсковыя склады.
«Сёньня два апараты самалётнага тыпу ўпалі прыблізна ў 5:30 і 5:50 раніцы на падлёце да складоў адной з вайсковых частак у выніку супрацьдзеяньня вайскоўцаў. Рэшткі знайшлі, разбурэньняў і пацярпелых няма», — напісаў Андрэй Вараб’ёў у сваім тэлеграм-канале.
Пракрамлёўскія тэлеграм-каналы ўдакладнілі, што гэта адбылося недалёка ад месца дысьлякацыі 15-га мотастралковага палка Таманскай дывізіі Ўзброеных сіл Расеі.
Яшчэ адзін дрон расейцы зьбілі нібыта каля вёскі Лукіна ў Новай Маскве.
ГЛЯДЗІЦЕ ТАКСАМА: У Расеі ў Белгарадзкай вобласьці і Варонежы дроны ўрэзаліся ў жылыя будынкі, ёсьць пацярпелыяРаней у чэрвені мясцовыя ўлады Расеі паведамлялі аб атаках дронаў на Варонеж, Курск і Белгарад. У выніку гэтых атак ахвяр не было, лёгкія траўмы атрымалі тры жыхары шматпавярховага дома ў Варонежы.
30 траўня мэр Масквы Сяргей Сабянін паведаміў аб атацы бесьпілётнікаў на Маскву і «нязначных пашкоджаньнях» некалькіх будынкаў. Тэлеграм-каналы паведамлялі аб нібыта 25 дронах, якія ляцелі на вельмі нізкай вышыні і зачапіліся за дрэвы і правады. На падлёце да Масквы тады зьбілі яшчэ нібыта чатыры бесьпілётнікі, а ў Падмаскоўі — больш за 10.
ГЛЯДЗІЦЕ ТАКСАМА: Дзьве атакі дронамі на сталіцы Ўкраіны і Расеі: у Кіеве ёсьць ахвяры, у Маскве нязначныя пашкоджаньніРасея штодзень атакуе Ўкраіну дронамі і ракетамі
Камандаваньне Паветранымі сіламі Ўкраіны паведамілі, што ў ноч на 21 чэрвеня Расея з паўночнага кірунку атакавала іранскімі дронамі захад краіны. Сродкі супрацьпаветранай абароны зьбілі ўсе бесьпілётнікі над Хмяльніцкай вобласьцю.
Расея апошнія некалькі месяцаў інтэнсіўна камбінуе ўдары дронамі і ракетамі па цэнтральнай і заходняй частцы Ўкраіны. Такім чынам 20 чэрвеня расейскія войскі атакавалі Кіеў, Львоў і Запарожжа.
Кожны дзень пад ракетным абстрэлам памежныя з Расеяй Чарнігаўская і Сумская вобласьці. У ноч на 21 чэрвеня ад артылерыйскіх абстрэлаў пацярпелі сем раёнаў Сумскай вобласьці. Папярэдне — без ахвяр і істотных разбурэньняў.
Генэральны штаб Узброеных сіл Украіны паведаміў, што па ўкраінскіх пазыцыях на фронце і прыфрантавой тэрыторыі ў ноч на 21 чэрвеня Расея нанесла 83 авіяцыйныя ўдары і 58 абстрэлаў з артылерыі.
За апошнія 24 гадзіны расейскія войскі выкарысталі супраць Украіны 33 ударныя дроны, але ўсе яны былі абясшкоджаныя супрацьпаветранымі сродкамі.
Паводле ААН, ахвярамі поўнамаштабнага расейскага ваеннага ўварваньня ва Ўкраіну сталі 24 862 цывільныя, у тым ліку 9083 забітыя і 15 779 параненых.
ГЛЯДЗІЦЕ ТАКСАМА: Новая атака Расеі на Кіеў, Львоў і ЗапарожжаВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.