Самая пажылая птушка ў сьвеце — 74-гадовая альбатросіха Ўіздам — адклала яйка на Гаваях. Пра гэта піша Associated Press са спасылкай на Службу аховы рыбных рэсурсаў і дзікіх жывёл ЗША.
Гэта яе першае яйка за апошнія чатыры гады, адзначылі ў службе. Уіздам вярнулася на атол з партнэрам Акеакамаем, якога да гэтага ня бачылі некалькі гадоў і баяліся, што ён загінуў. Цёмнасьпінныя альбатросы ўтвараюць пару на ўсё жыцьцё — Уіздам з Акеакамаем выседжваюць яйкі з 2006 году.
Супрацоўнікі службы настроеныя аптымістычна і лічаць, што птушаня вылупіцца.
Уіздам акальцавалі ўжо дарослаю ў 1956 годзе. З таго часу яна вывела прыкладна трыццаць птушанят, перажыўшы як мінімум трох сваіх партнэраў.
Альбатросы адкладаюць па адным яйку і ня кожны год. Бацькі выседжваюць яйка па чарзе на працягу двух месяцаў і выкормліваюць птушаня яшчэ каля паўгода.
Форум