Кэралайн Лівіт была прэс-сакратаркай перадвыбарнай кампаніі Трампа і памочніцай прэс-сакратара ў ягонай першай адміністрацыі. Цяпер яна стане самай маладой прадстаўніцай Белага дома ў гісторыі ЗША. Да гэтага дасягненьне належала Рону Зіглеру, які заняў пасаду прэс-сакратара Белага дома ў 29 гадоў пры Рычардзе Ніксане.
«Кэралайн разумная, цьвёрдая і зарэкамэндавала сябе як высокаэфэктыўны камунікатар. Я абсалютна ўпэўнены, што яна выдатна выявіць сябе на трыбуне і дапаможа данесьці да амэрыканскага народа наша пасланьне», — цытуе заяву Трампа USA Today.
Намінаваны на пасаду міністра ўнутраных спраў ЗША Дуглас Бэргам цяпер працуе губэрнатарам Паўночнай Дакоты, а ў 2023 годзе плянаваў змагацца за намінацыю на пасаду прэзыдэнта ЗША ад Рэспубліканскай партыі. Таксама Бэргам стане старшынёй «сьвежасфармаванай і вельмі важнай» Нацыянальнай рады па энэргетыцы, гаворыцца ў заяве Трампа ў сацыяльнай сетцы Truth Social. Паводле задумы Трампа, рада аб’яднае ўсе ведамствы, зьвязаныя са здабычай і рэалізацыяй энэргарэсурсаў.
Прэзыдэнцкія выбары ў ЗША прайшлі 5 лістапада. Іх пераможцам стаў кандыдат ад Рэспубліканскай партыі Дональд Трамп, які набраў 312 галасоў выбарнікаў пры неабходных 270. Інаўгурацыя абранага прэзыдэнта заплянавана на 20 студзеня 2025 году.
Пасьля перамогі Дональд Трамп намінаваў
- сэнатара ад Флорыды Марка Рубіё на пасаду дзяржаўнага сакратара ЗША,
- вядоўцу тэлеканала Fox News Піта Гэгсэта на пасаду міністра абароны ЗША,
- Джона Рэткліфа, былога дырэктара Нацыянальнай выведкі, на пасаду кіраўніка Цэнтральнага выведвальнага ўпраўленьня,
- былога афіцэра спэцназу кангрэсмэна Майка Ўолца на ролю дарадцы ў нацыянальнай бясьпецы,
- Робэрта Кенэдзі-малодшага на пасаду кіраўніка Міністэрства аховы здароўя і сацыяльных службаў,
- мільярдэр Ілан Маск і бізнэсовец і былы кандыдат у прэзыдэнты ад рэспубліканцаў Вівэк Рамасвамі ўзначаляць нядаўна створанае дэпартамэнт павышэньня эфэктыўнасьці дзяржаўнага кіраваньня.
Форум