28 красавіка спаўняецца год з дня гібелі журналісткі ўкраінскай службы Радыё Свабода Веры Гірыч. Яна загінула ў выніку расейскага ракетнага ўдару па Кіеве.
Паводле слоў прэзыдэнта Ўкраіны Ўладзіміра Зяленскага, Расея абстраляла Кіеў у той дзень адразу пасьля завяршэньня яго перамоваў з генэральным сакратаром ААН Антонію Гутэрышам. Пры трапленьні ў 25-павярховы жылы дом у ім часткова абрынуліся першыя два паверхі і ўзьнік пажар. Вера Гірыч стала адзінай, хто загінуў у выніку гэтага ўдару. Яе цела знайшлі раніцай 29 красавіка пад заваламі.
Вера Гірыч пачала працу ў кіеўскім бюро Радыё Свабода 1 лютага 2018 году. Да гэтага яна працавала на розных украінскіх тэлеканалах.
Прэзыдэнт мэдыякарпарацыі Радыё Свабодная Эўропа/Радыё Свабода Джэймі Флай у заяве да гадавіны гібелі журналісткі зноў выказаў спачуваньні родным і блізкім Веры Гірыч.
«На працягу апошняга году калегі Веры з украінскай службы і супрацоўнікі „Настоящего Времени“, якія працуюць ва Ўкраіне, працягвалі сваю сьмелую працу, нягледзячы на пастаянныя напады і складаную апэратыўную абстаноўку. Як і Вера да яе трагічнай сьмерці, мы кожны дзень працягваем паведамляць пра жудасныя наступствы шырокамаштабнага расейскага ўварваньня ва Ўкраіну аўдыторыі па ўсім сьвеце, у тым ліку і ў Расеі.
Бяз нашага асьвятленьня гэтых падзей у мільёнаў людзей не было б доступу да фактаў пра тое, што адбываецца ва Ўкраіне. Працягваць выконваць нашу місію, нягледзячы на цяжкасьці, — гэта лепшае, што мы можам зрабіць, каб ушанаваць памяць Веры»,— гаворыцца ў паведамленьні.
- За год поўнамаштабнага расейскага ўварваньня ва Ўкраіне былі забітыя ня менш за 50 праваабаронцаў, журналістаў і гуманітарных валянтэраў. Такія лічбы прыводзіць міжнародны праект Front Line Defenders.
- Сярод загінулых — украінскі журналіст Максім Левін, як мяркуецца, забіты расейскімі вайскоўцамі, і расейская журналістка Аксана Бауліна, якая загінула пры ўдары па Кіеве.
