Пра гэта паведамляюць сайт «Брянские новости» і тэлеграм-канал «Подслушано Клинцы» — пацярпелы абʼект у гэтых публікацыях называюць «вайсковай часткай».
Афіцыйнага пацьверджаньня гэтай інфармацыі не паступала ні ад МНС, ні ад уладаў Бранскай вобласьці.
У тэлеграм-канале «Подслушано Клинцы» спачатку зьявіліся паведамленьні аб чатырох выбухах, потым фота і відэа пажару, а затым фатаграфіі згарэлай тэхнікі. У канале сьцьвярджаецца, што пацярпелых няма.
Улады расейскіх рэгіёнаў, якія мяжуюць з Украінай, рэгулярна паведамляюць аб абстрэлах сваёй тэрыторыі. 29 сакавіка зьявіліся паведамленьні аб выбухах на складзе боепрыпасаў у раёне вёскі Красный Октябрь Белгарадзкай вобласці Расеі, 1 красавіка стала вядома аб выбухах на нафтабазе ў самім Белгарадзе.
21 красавіка ў Расеі пры дзіўных абставінах адбыўся пажар у адміністрацыйным корпусе навуковага інстытута Мінабароны ў Цьверы.
25 красавіка загарэлася нафтабаза ў Бранску, 27 красавіка пажар гасілі на складзе боепрыпасаў у Белгарадзкай вобласці, у вёсцы Старая Нялідаўка за 30 км ад мяжы з Украінай.
Расейскія ўлады гэтыя здарэньні не камэнтуюць, а ўкраінскія не настойваюць на сваёй датычнасьці.
