У Эстоніі дзецям і моладзі забаранілі ўдзельнічаць у мерапрыемствах у Беларусі і Расеі

«Санкцыяй забараняецца арганізоўваць удзел грамадзян Эстоніі да 21 году ці асобаў з эстонскім дазволам на жыхарства або правам на пражываньне ў Эстоніі ў мерапрыемствах, якія праходзяць на тэрыторыі Расеі і Беларусі або на тэрыторыях Украіны, незаконна акупаваных ці анэксаваных Расеяй, і ў рамках якіх апраўдваюць або падтрымліваюць агрэсіўную палітыку Расеі і Беларусі, узброеныя сілы, агрэсію супраць Украіны ці акупацыю або анэксію тэрыторыі Ўкраіны.

Таксама забараняецца сьвядома і непасрэдна спрыяць удзелу ў вышэйзгаданых мерапрыемствах», — гаворыцца ў паведамленьні нацыянальнай тэлерадыёвяшчальнай кампаніі Эстоніі.

Адзначаецца, што ўрад Эстоніі таксама забараніў прымаць любыя сродкі ці выгады ад арганізатараў такіх мерапрыемстваў і тых, хто іх падтрымлівае.

Пры гэтым, паводле кіраўніка МЗС Эстоніі Маргуса Цахкны, санкцыі скіраваныя не на маладых людзей і дзяцей, а на арганізатараў мерапрыемстваў і іх прыхільнікаў. Адпаведныя меры, зазначыў ён, зьвязаныя са спробамі Расеі паўплываць на моладзь, у тым ліку праз мову, культуру, адукацыю, спорт, гісторыю, Рускую праваслаўную царкву і прапагандысцкія СМІ.

Кіраўнік МУС Эстоніі Лаўры Ляэнэметс патлумачыў, што агульная рэкамэндацыя для моладзі — «ня езьдзіць у гэтыя краіны і пазьбягаць удзелу ў любых мерапрыемствах у Расеі або Беларусі».

«Дзіцячыя лягеры, якія арганізуюць у Расеі і Беларусі, маюць дакладную ідэалягічную нагрузку, цэнтрам якой зьяўляецца ўкараненьне расейскага імпэрыялістычнага мысьленьня. Калі першапачаткова размова ідзе аб фармаваньні сьветапогляду моладзі і прыцягненьні яе ў сваю прапагандысцкую прастору, дык трэба разумець, што такія лягеры таксама зьяўляюцца добрай глебай для стварэньня кантактнай сеткі і вэрбавальнай дзейнасьці, якую расейскія спэцслужбы могуць скарыстаць у далейшым», — зазначыў Ляэнэметс.

Парушальнікам уведзенай забароны пагражаюць санкцыі ад грашовага штрафу да 5 гадоў зьняволеньня.

Раней стала вядома, што ў ВНУ Беларусі цяпер навучаюцца каля 30 тысяч замежных студэнтаў. Пра гэта заявіў начальнік галоўнага ўпраўленьня прафэсійнай адукацыі Міністэрства адукацыі Сяргей Пішчоў. «На сёньняшні дзень гэта больш за 90 мільёнаў даляраў па краіне ад адукацыі. Больш чым са 110 краін да нас паступаюць у нашы ўстановы вышэйшай адукацыі і каледжы», — сказаў Пішчоў у этэры СТВ.