Зьявіліся фота дзясяткаў загінулых вайскоўцаў РФ на Курскім кірунку, сярод іх ёсьць паўночнакарэйцы

Крыніцы «Схем» сярод вайскоўцаў сьцьвярджаюць, што сярод іх ёсьць вайскоўцы з Паўночнай Карэі, якія служылі ў зводных частках расейскай арміі.

14 сьнежня прэзыдэнт Украіны Уладзімір Зяленскі заявіў аб зьяўленьні інфармацыі пра пачатак выкарыстаньня паўночнакарэйскіх войскаў у штурмах украінскіх сіл на Куршчыне. «Расейцы ўключаюць іх у зводныя падразьдзяленьні і выкарыстоўваюць у баявых дзеяньнях у раёнах Курскай вобласці. Проста ёсьць», — сказаў кіраўнік дзяржавы.

Паводле інфармацыі Галоўнага ўпраўленьня выведкі Мінабароны Ўкраіны, за мінулыя суткі вайскоўцы з КНДР падчас штурмаў страцілі каля 200 чалавек.

У канцы кастрычніка заходнія СМІ паведамілі, што КНДР накіравала ў Расею вайскоўцаў для ўдзелу ў баявых дзеяньнях супраць Украіны. Па дадзеных Украіны і краін Захаду, у Курскую вобласьць прыбылі больш за 10 тысяч паўночнакарэйскіх вайскоўцаў.

5 лістапада крыніцы Financial Times і Public у спэцслужбах паведамілі аб першых баявых сутыкненьнях украінскіх і паўночнакарэйскіх вайскоўцаў у Курскай вобласьці. Адзначалася, што пакуль «пра буйныя сутыкненьні гаворкі не ідзе».

У пачатку лістапада прэзыдэнт Украіны Уладзімір Зяленскі заявіў, што паўночнакарэйскае войска панесла першыя страты. Масква і Пхэньян не пацьвердзілі непасрэднага ўдзелу паўночнакарэйскіх вайскоўцаў у баях.