Хроніка перасьледу 9 сьнежня: лесьніка са Сьвіслачы судзяць за камэнтары паводле 6 крымінальных артыкулаў

Суд над 44-гадовым лесьніком са Сьвіслачы Вітольдам Шалкевічам пачаўся 9 сьнежня ў Горадзенскім абласным судзе. Яго абвінавачваюць у «абразе» Лукашэнкі (ч. 1 і ч. 2 арт. 368 КК), «арганізацыі або ўдзеле ў дзеяньнях, якія парушаюць грамадзкі парадак» (ч. 1 арт. 342 КК), «зьдзеку зь дзяржаўных сымбаляў» (арт. 370 КК), «абразе судзьдзі» (арт. 391 КК), «абразе прадстаўніка ўлады» (арт. 369 КК) і «распальваньні варожасьці» (ч. 1 і ч. 3 арт. 130 КК). Яму пагражае да 12 гадоў зьняволеньня.

Справу палітвязьня разглядае судзьдзя Руслан Гурын.

Вітольд Шалкевіч родам зь мястэчка Поразава Сьвіслацкага раёну. У Вітольда ёсьць жонка і дзьве непаўналетнія дачкі.

Яго затрымалі ў жніўні 2023 году проста на працы. Спачатку прысудзілі арышт за «распаўсюд экстрэмісцкіх матэрыялаў».

Пасьля сілавікі зьнялі зь ім «пакаяльнае» відэа і перавялі зь СІЗА. Па зьвестках праўладных тэлеграм-каналаў, Шалкевіч пакінуў некалькі тысяч камэнтароў у розных чатах, піша «Наша ніва».

Судзяць палітзьняволеную маці траіх непаўналетніх дзяцей

Справу 45-гадовай Вікторыі Дамастой пачынаюць разглядаць 9 сьнежня ў Горадзенскім абласным судзе. Працэс вядзе судзьдзя Юры Казакевіч.

Дамастой упершыню затрымалі ў канцы студзеня падчас масавага хапуну супрацоўнікамі КДБ за прадуктовую дапамогу ад ініцыятывы INeedHelpBY. Падставай сталі лісты і грошовыя пераводы палітвязням, паведамляе «Вясна». Аднак пад варту жанчыну тады не ўзялі. Падчас ператрусу ў яе канфіскавалі тэхніку і грошы. Пасьля атрыманьня вынікаў экспэртызы тэхнікі 20 красавіка Вікторыю зьмясьцілі за краты паводле пяці артыкулаў Крымінальнага кодэксу: арт. 130 («Распальваньне іншай сацыяльнай варожасьці»), арт. 367 («Паклёп на прэзыдэнта»), арт. 342 («Актыўны ўдзел у групавых дзеяньнях, якія груба парушаюць грамадзкі парадак»), ч. 1 і ч. 2 арт. 361-4 («Садзейнічаньне экстрэмісцкай дзейнасьці»).

У Вікторыі трое непаўналетніх дзяцей.