Патрыярхам Баўгарскай праваслаўнай царквы абралі мітрапаліта Данііла, якога называюць русафілам

Мітрапаліт Відзінскі Данііл у нядзелю абраны новым патрыярхам Баўгарскай праваслаўнай царквы і мітрапалітам Сафійскім. Ягоную кандыдатуру падтрымалі чальцы Патрыяршай выбарчай царкоўнай рады, ён набраў толькі на тры галасы больш, чым мітрапаліт Урацкі Грыгоры

Баўгарскія СМІ называюць новага патрыярха «русафілам» і прыхільнікам Крамля, у публічных выступах якога нярэдка гучалі тэзісы, блізкія да расейскай афіцыйнай прапаганды.

Ранейшы патрыярх Баўгарскай царквы Нэафіт памёр у сакавіку. Кандыдатамі на патрыяршы пасад сталі мітрапаліты Грыгоры, Данііл і Гаўрыіл. У першым туры за мітрапаліта Грыгорыя прагаласавалі 64 дэлегаты, за Данііла — 51, за мітрапаліта Лаўчанскага Гаўрыіла — 19. У другім туры за Данііла прагаласавалі 69 дэлегатаў, за Грыгорыя — 66, тры бюлетэні былі прызнаныя несапраўднымі, паведамляе баўгарская служба Радыё Свабода.

Патрыярх Данііл пасьля абраньня ўзьнёс малітву і дабраславіў баўгарскі народ. На цырымоніі прысутнічалі Сусьветны Патрыярх Варфаламей, які знаходзіцца ў канфлікце з Масквой, а таксама прэзыдэнт Баўгарыі Румэн Радэў.

Патрыярху Даніілу 52 гады, ягонае сьвецкае імя Атанас Нікалаў. Як адзначае баўгарская служба Радыё Свабода, Данііл рэзка крытыкаваў рашэньне ўладаў выправадзіць з Баўгарыі архімандрыта Расейскай праваслаўнай царквы Васіяна і двух іншых сьвятароў РПЦ па падазрэньні ў супрацоўніцтве з расейскімі спэцслужбамі. Данііл таксама адмовіўся асудзіць расейскае ўварваньне ва Ўкраіну і наракаў на тэндэнцыі «сеяць нянавісьць да аднаго з бакоў вайны, прызначанага адзіным і несправакаваным агрэсарам». Само ўварваньне ён не падтрымаў, заяўляючы, што выступае за мір.

ГЛЯДЗІЦЕ ТАКСАМА: Беларусь увяла дадатковыя контрасанкцыі супраць «недружалюбных» дзяржаў

Баўгарская праваслаўная царква — найбуйнейшая канфэсія ў краіне — не заняла афіцыйнай пазыцыі ў адносінах да вайны ва Ўкраіне, хоць патрыярх Нэафіт незадоўга да сьмерці асудзіў яе, пры гэты не згадаўшы Расею наўпрост.

У РПЦ заявілі, што Баўгарскую царкву ўзначаліў «мужны, прынцыповы герарх», «прыхільнік цесных сувязей паміж Баўгарскай і Рускай царквой».

Баўгарская праваслаўная царква падтрымлівае адносіны як з Сусьветным патрыярхатам, так і з РПЦ. Данііл публічна крытыкаваў патрыярха Варфаламея і падтрымліваў Маскоўскі патрыярхат. Сьвяты сынод Баўгарскай царквы аднак заявіў, што гэта не афіцыйная пазыцыя БПЦ.