Паветраныя сілы Ўзброеных сіл Украіны паведамілі, што ўначы 27 красавіка Расея атакавала Ўкраіну з дапамогай 34 крылатых і балістычных ракет, зь іх 21 удалося зьбіць. Пашкоджаныя 4 цеплаэлектрастанцыі і бальніца, ёсьць пацярпелыя, піша «Настоящее время».
Як паведамілі ў прыватнай энэргакампаніі ДПЭК, з прычыны атакі сур’ёзна пацярпелі чатыры цеплаэлектрастанцыі. Паведамляецца, што ёсьць пацярпелыя, іх колькасьць не ўдакладняецца.
Міністар энэргетыкі Ўкраіны Герман Галушчанка паведаміў, што былі атакаваныя абʼекты ў Днепрапятроўскай, Івана-Франкоўскай і Львоўскай абласьцях. «Ёсьць некаторыя пашкоджаньні абсталяваньня. На адным з абʼектаў пацярпеў начальнік зьмены — энэргетык атрымаў кантузію», — напісаў Галушчанка.
У Харкаве пад удар трапіла бальніца, паведаміў кіраўнік горада Ігар Церахаў. У момант атакі ў мэдыцынскай установе знаходзіліся, паводле яго зьвестак, каля тысячы чалавек — 900 пацыентаў і яшчэ 250 работнікаў.
«На шчасьце, ракеты патрапілі ў зямлю, а не ў карпусы мэдустановы — у адваротным выпадку цяжка ўявіць колькасьць загінулых і пацярпелых. Ёсьць адзін паранены чалавек, ступень — лёгкая», — піша ён.
Кіраўнік Харкаўскай абласной адміністрацыі Алег Сінягубаў удакладніў, што была атакаваная трэцяя псыхіятрычная бальніца. Ён сьцьвярджае, што расейскае войска ўдарыла па мэдустанове з дапамогай ракеты комплексу С-300. Выбухной хваляй пашкодзіла некалькі будынкаў, у прыватнасьці, выбітае шкло, закранутыя дахі, лініі электраперадач, вадаправод і іншыя інжынэрныя камунікацыі.
У Львоўскай вобласьці былі атакаваныя два абʼекты крытычнай энэргетычнай інфраструктуры ў Стрыйскім і Чырвонаградзкім раёнах, паведаміў кіраўнік рэгіёну Максім Казіцкі. Паводле яго, удар нанесьлі крылатымі ракетамі і «Кінжаламі». На атакаваных абʼектах узьніклі пажары, іх патушылі, ёсьць разбурэньні. Пацярпелых няма.
У Івана-Франкоўскай вобласьці ў выніку атакі на абʼект крытычнай інфраструктуры таксама ўспыхнуў пажар, ніхто не пацярпеў, паведаміла кіраўніца абласной адміністрацыі Сьвятлана Анішчук.
У Днепрапятроўскай вобласьці ў выніку ўдару пашкоджаныя энэргетычныя абʼекты ў Дняпроўскім і Крыварожскім раёнах, напісаў кіраўнік рэгіёну Сяргей Лысак. Ён дадаў, што здарылася некалькі пажараў. Адзін пацярпелы — 39-гадовы мужчына, яго шпіталізавалі ў стане сярэдняй цяжкасьці. У Крыварожскім раёне ўзьніклі перабоі з водазабесьпячэньнем.
ГЛЯДЗІЦЕ ТАКСАМА: На нафтазаводзе ў Краснадарскім краі РФ пасьля атакі дронаў узьнік пажар. Яго працу часткова прыпыніліВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.