Кіраўнік Херсонскай абласной вайсковай адміністрацыі Аляксандар Пракудзін заявіў аб невялікім зьніжэньні ўзроўню вады ў Дняпры каля Херсону, але гуманітарная сытуацыя ўсё яшчэ застаецца крытычнай.
«Падтопленымі застаюцца 32 населеныя пункты на правым беразе Дняпра і 14 — на часова акупаванай тэрыторыі. Расейцы блякуюць эвакуацыю грамадзян — самі не праводзяць, і нам перашкаджаюць, адкрываючы агонь у сьпіну старым і маламабільным жыхарам вобласьці», — паведаміў Аляксандар Пракудзін у сваім тэлеграм-канале.
Паводле яго, у выніку расейскіх абстрэлаў Херсонскай вобласьці тры цывільныя загінулі і 12 атрымалі раненьні.
Ва ўрадзе Ўкраіны паведамілі, што з тэрыторыі Херсонскай вобласьці эвакуавалі 2722 грамадзян, у тым ліку 205 дзяцей і 76 маламабільных грамадзян. Зь Мікалаеўскай вобласьці эвакуавалі 982 грамадзян, у тым ліку 167 дзяцей. Урадавыя крыніцы сьцьвярджаюць, што з акупаваных Расеяй тэрыторый удалося вывезьці 112 грамадзян.
ГЛЯДЗІЦЕ ТАКСАМА: Расейцы абстралялі эвакуацыйны човен пад Херсонам: загінулі тры чалавекі, — прадстаўнік украінскай адміністрацыі12 чэрвеня ўкраінскае МУС паведаміла, што ў выніку затапленьня загінулі сама меней 10 чалавек, 42 лічацца зьніклымі бязь вестак. Гэта зьвесткі толькі па абласьцях, падкантрольных Украіне. Рэальная колькасьць ахвяр можа быць нашмат большай: паводле валянтэраў, цяпер невядомы лёс больш як 300 чалавек.
Дамбу Кахоўскай ГЭС разбурылі ноччу 6 чэрвеня. Яе разбурэньне пацягнула за сабой затапленьне вялікіх тэрыторый ніжэй па цячэньні і абмяленьне вадасховішча вышэй. Затоплена вялікая тэрыторыя па абодвух берагах Дняпра. Зона затапленьня на падкантрольным Расеі левым беразе большая, чым на кантраляваным Украінай правым.
ГЛЯДЗІЦЕ ТАКСАМА: ААН: Каля 700 тысяч чалавек ва Ўкраіне засталіся без пітной вады з-за падрыву дамбы Кахоўскай ГЭСУкраіна абвінавачвае ў падрыве дамбы Кахоўскай ГЭС Расею і сьцьвярджае, што расейскія вайскоўцы замінавалі ГЭС раней на выпадак украінскага наступу. Украінскія прадстаўнікі падкрэсьліваюць, што грэбля праектавалася зь вялізным запасам трываласьці супраць вонкавых узьдзеяньняў, і лічаць, што яна была падарваная знутры.
Крэмль называе разбурэньне дамбы «наўмыснай дывэрсіяй» з боку Кіева, не ўдакладняючы пры гэтым, што менавіта магло прывесьці да яе разбурэньня.
Яшчэ адна вэрсія — натуральнае разбурэньне грэблі з прычыны ранейшых абстрэлаў і нядобрасумленнага абслугоўваньня ГЭС Расеяй, якая кантралявала яе і, у прыватнасьці, ня зьнізіла занадта высокі ўзровень вады ў вадасховішчы.
Затопленыя і зьнясіленыя. Як ратуюць хатніх жывёл у Херсоне. ФОТАГАЛЕРЭЯ
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.