Прычынай свайго ўчынку Інджэ назваў хвалю кампрамату, які абрынуўся на яго падчас выбарчай кампаніі. Палітык заявіў, што на працягу 45 дзён у турэцкіх СМІ распаўсюджваліся фэйкавыя фатаздымкі, якія кампрамэтуюць яго, а праваахоўныя органы ня сталі расьсьледаваць гэтыя факты. Інджэ таксама падкрэсьліў, што дзяржава ня здолела абараніць ягоную рэпутацыю як грамадзяніна краіны і кандыдата ў прэзыдэнты Турэччыны, піша «Настоящее время».
У той жа час Інджэ, як піша DW, не сказаў, што здымае сваю кандыдатуру на карысьць нейкага кандыдата ў прэзыдэнцкай гонцы. Ён таксама заклікаў грамадзян Турэччыны галасаваць за сваю партыю на парлямэнцкіх выбарах, якія адбудуцца паралельна з прэзыдэнцкімі, 14 траўня.
Тым часам асноўны супернік дзейнага шматгадовага прэзыдэнта Турэччыны Рэджэпа Таіпа Эрдагана, Кемаль Кылічдараглу, якога падтрымлівае апазыцыйны альянс з шасьці партый, кажа, што ў выпадку перамогі ён прынясе краіне свабоду і дэмакратыю, чаго б гэта ні каштавала.
«Моладзь хоча дэмакратыі, — заявіў ён BBC. — Яны ня хочуць, каб паліцыя прыходзіла да іх дзьвярэй раніцай толькі таму, што яны напісалі твіт».
Кемаль Кылічдараглу — галоўны супернік лідэра ісламістаў на выбарах 14 траўня, ён мае невялікае лідэрства ў апытаньнях грамадзкай думкі. Чакаецца, што гэтая напружаная гонка выйдзе ў другі раўнд.
Цяпер туркі могуць трапіць у турму за «абразу прэзыдэнта».
«Я кажу маладым людзям, што яны могуць свабодна крытыкаваць мяне. Я буду сачыць за тым, каб яны мелі гэта права», — кажа 74-гадовы Кылічдараглу.
«Быць у палітыцы ў Турэччыне азначае выбраць жыцьцё з рызыкай. Я буду ісьці сваім шляхам, што б ні рабілі Эрдаган і ягоныя саюзьнікі, — цытуе яго ВВС. — Яны ня могуць спужаць мяне. Яны ня могуць мяне напалохаць. Я даў абяцаньне гэтай нацыі».
Кылічдараглу сказаў карэспандэнту ВВС перад адным зь мітынгаў, што ён пераарыентуе краіну і аддасьць прыярытэт адносінам з Захадам, а не з Крамлём.
«Мы хочам стаць часткай цывілізаванага сьвету, — кажа ён. — Мы хочам свабодных СМІ і поўнай незалежнасьці судовай сыстэмы. Эрдаган ня думае так. Ён хоча быць больш аўтарытарным. Розьніца паміж намі і Эрдаганам — гэта розьніца паміж чорным і белым».
Як заўважае ВВС, Турэччына цяпер у няпростай эканамічнай сытуацыі. Многія вінавацяць у нястрымнай інфляцыі эканамічную палітыку дзейнага прэзыдэнта. Той, хто пераможа, атрымае ў спадчыну разбураную эканоміку і падзеленую нацыю.
Тым ня менш, многія рэлігійныя кансэрватары будуць трымацца Эрдагана. Ён размаўляе на іх мове. І ён падмацаваў сваю падтрымку перадвыбарчымі выдаткамі, уключаючы павышэньне заробкаў.
З набліжэньнем дня выбараў адчуваецца напружаньне. Новае апытаньне грамадзкай думкі паказвае, што Кылічдараглу атрымае прэзыдэнцкую пасаду, але альянс прэзыдэнта Эрдагана лідзіруе ў барацьбе за парлямэнт.
Паколькі перадвыбарчая напружанасьць павялічваецца і, хутчэй за ўсё, адбудзецца другі тур, ніхто ня можа быць упэўнены, што наступныя тыдні пройдуць спакойна.