Вайна Расеі супраць Украіны: ранішні абстрэл Мікалаева; спыненьне працы ўкраінскіх банкаў у Херсоне

31 ліпеня ідзе 158-ы дзень паўнамаштабнай вайны Расеі супраць Украіны. Расейцам не ўдаецца прасунуцца наперад, але яны працягваюць бамбардаваньні ўкраінскіх гарадоў, забіваючы цывільных і зьнішчаючы жылыя будынкі і архітэктуру.

Абстрэл Мікалаева

У апошні дзень ліпеня Мікалаеў зазнаў масавага абстрэлу. Напэўна, наймацнейшага за ўвесь час. Пра гэта паведаміў мэр Мікалаева Аляксандар Сянкевіч.

Магутныя выбухі было чуваць пасьля гадзіны ночы і каля пятай раніцы. Разбураны шэраг аб’ектаў, пашкоджаныя жылыя дамы.

У месцах падзеньня набояў узьнік шэраг пажараў. Працуюць ратавальнікі. Падрабязнай інфармацыі пра маштаб стратаў і колькасьць ахвяр пакуль няма.

У выніку начнога абстрэлу загінуў Герой Украіны і гендырэктар кампаніі «Нібулон», адзін з найбагацейшых людзей Украіны Аляксей Вадатурскі, а таксама яго жонка Раіса. Пра гэта паведаміў старшыня Мікалаеўскай аблдзяржадміністрацыі Віталь Кім.

Таксама абстрэлаў зазнаў Нікапаль.

У Херсоне спынілі працу апошнія ўкраінскія банкі

Расейцы на базарах і ў крамах акупаванага імі Херсону прымушаюць людзей вывешваць цэны ў расейскіх рублях і забіраюць у прадпрымальнікаў украінскія плацежныя тэрміналы. Днямі захопнікі ўварваліся адначасова ў тры аддзяленьні апошняга ўкраінскага банка, які яшчэ працаваў пад акупацыяй. Пад пагрозамі супрацоўнікам зброяй, грошы і тэхніку вынесьлі з памяшканьня, паведаміў тэлеканал ТСН.

Супрацоўнікаў адпусьцілі толькі пасьля таго, як ва ўсіх перапісалі пашпартныя дадзеныя.

З пачатку акупацыі большасьць банкаў у Херсоне зачынілася. Працавалі толькі некалькі аддзяленьняў, каля якіх па некалькі дзён стаялі чэргі, каб зьняць гатоўку.

З гэтага часу такая магчымасьць у горадзе недаступная, акупанты выводзяць з абарачэньня грыўню.

ГЛЯДЗІЦЕ ТАКСАМА: 10 сьмерцяў беларускіх добраахвотнікаў і іншыя лічбы і факты пра вайну ва Ўкраіне, якая ідзе ўжо 150 дзён

Атака на штаб расейцаў у Севастопалі

Штаб Чарнаморскага флёту ў Севастопалі быў атакаваны ўкраінскім бокам, як мяркуецца, з выкарыстаньнем бесьпілётніка, пацярпелі пяць чалавек, паведаміў губэрнатар Міхаіл Разважаеў. Ягоныя словы прыводзіць расейскае дзяржаўне агенцтва ТАСС.

Сьвяточныя мерапрыемствы да дня Вайскова-марсокга флёту Расеі ў акупаваным Севастопалі перанесены з-за гэтай атакі, жыхароў просяць заставацца дома.

Украінскі бок пакуль нічога не паведамляе пра ўдар.

ГЛЯДЗІЦЕ ТАКСАМА: Украінскае войска каля Херсону пашкодзіла мост цераз Дняпро, важны для тылавога забесьпячэньня расейцаў

Вайна Расеі супраць Украіны

А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.