Пра гэта ў Дзяржаўнай думе заявіў прэм’ер-міністар Расеі Міхаіл Мішусьцін.
Мішусьцін згадаў нядаўні візыт у Менск і паведаміў, што правёў шэраг сустрэчаў. Ягоны выступ цытуе ТАСС.
«Я глыбока веру ў патэнцыял саюзнай дамовы, лічу, што праца, якая праведзеная, зьвязаная з інтэграцыяй і з распрацоўкай дарожных мапаў па ўсіх напрамках узаемадзеяньня зь Беларусьсю, была зробленая выдатна. Там літаральна крыху засталося рэчаў, якія трэба абмеркаваць. І веру ў тое, што калі мы сумесна па гэтых мапах створым адзіную прастору і прымем, з канфіскацыямі, магчыма, адзіны Падатковы кодэкс, калі мы зможам уніфікаваць нашы стаўкі, падыходы, то мы зможам размаўляць у тым ліку пра мэханізм цэнаўтварэньня на энэрганосьбіты ўжо, як у прынцыпе і прапануюць нашы беларускія партнэры», — заявіў прэмʼер Расеі.
Перамовы пра паглыбленую інтэграцыю Беларусі і Расеі актывізаваліся ў другой палове 2019 году. Бакі дамовіліся падпісаць 31 дарожную мапу. Зьмест гэтых дакумэнтаў шырокай грамадзкасьці невядомы. У Менску з нагоды падпісаньня інтэграцыйных дамоў прайшлі акцыі пратэсту.
«Паглыбленьне інтэграцыі» Беларусі і Расеі. Што важна ведаць
Аляксандар Лукашэнка і Ўладзімір Пуцін, ліпень 2019
- Урады Беларусі і Расеі зьбіраліся ўзгадніць 31 стратэгічны плян інтэграцыі. Паволе расейскага прэм’ер-міністра Дзьмітрыя Мядзьзведзева, няўзгодненым застаўся 1 плян — пра наднацыянальныя органы.
- Што менавіта зьбіраюцца падпісаць Лукашэнка і Пуцін, а таксама на што пагадзіліся ўрады ў стратэгічных плянах, публічна не агучваецца.
- Тэма «паглыбленьня інтэграцыі» пачалася зь перамоваў пра кампэнсацыю «падатковага манэўру». Але ў «праграме інтэграцыі» няма кампэнсацыі «падатковага манэўру», бюджэт разьлічылі безь яе.
- У канцы 2018 году Мядзьведзеў заявіў, што Расея гатовая «праводзіць адзіную палітыку ў галіне падаткаў, цэна- і тарыфаўтварэньня» толькі тады, калі будуць выкананыя ўмовы пагадненьня аб «саюзнай дзяржаве» 1999 году — а гэта агульныя валюта, суд і мытня.
- Гэтыя ўмовы празвалі «ўльтыматумам Мядзьведзева». Аляксандар Лукашэнка тады адказаў жорстка: маўляў, «шантажаваць марна. Разумею намёкі — уступайце ў склад Расеі. Гэтага ня будзе ніколі».
- 19 сьнежня 2019 году Ўладзімір Пуцін заявіў, што зь Беларусьсю абмяркоўваюць стварэньне наднацыянальных органаў — кантрольнага і эмісійнага. 23 сьнежня Мядзьведзеў паўтарыў, што без наднацыянальных органаў ня будзе кампэнсацыі «падатковага манэўру» і іншай дапамогі Беларусі.
- 17 лістапада Лукашэнка абурыўся тым, што расейцы «кожны раз падсоўваюць новыя ўмовы, у выніку мы ў эканоміцы нешта страчваем», і рытарычна спытаў: «На храна патрэбен такі саюз?».
- Шэраг беларусаў лічаць, што «паглыбленьне інтэграцыі» ўсё ж можа прывесьці да страты незалежнасьці Беларусі. Палітыкі і культурныя дзеячы прынялі 1 сьнежня сумесную заяву «Аб пагрозе Незалежнасьці Беларусі», а 4 сьнежня супраць інтэграцыі выступілі беларускія Telegram-каналы і суполкі «Ўкантакце».
- Акцыі супраць паглыбленьня інтэграцыі Беларусі і Расеі прайшлі ў Менску 7, 8, 20 і 21 сьнежня. А таксама ў Горадні, Пінску, Лідзе. За мяжой — у Польшчы, Украіне, Літве, Чэхіі, Вугоршчыне, Бэльгіі, Ізраілі, ЗША, Канадзе.
-
Агульная сума штрафаў пратэстоўцам — каля 65 тысяч даляраў. Таксама ўдзельнікам акцый прысудзілі агулам 375 сутак арышту.
- 24 сьнежня ў інтэрвію «Эхо Москвы» Лукашэнка заявіў, што акцыі супраць «паглыбленьня інтэграцыі» не былі масавымі («400 чалаек — гэта наша ядро апазыцыі»), і «нехта падказаў, аплаціў, фонды ім даюць прыстойныя грошы». Лукашэнка дадаў, што сам ня пойдзе на тое, «ад чаго яны спрабуюць усьцерагчы беларускі народ», і назваў сябе «галоўны абаронца сувэрэнітэту і незалежнасьці».
Спэцпрапект «Чаму Беларусь не Расея»
ГЛЯДЗІЦЕ ТАКСАМА: Што азначае патрабаваньне Расеі перадаць 95% паўнамоцтваў на наднацыянальны ўзровень? Разьбіраем заяву беларускага амбасадара