18 ліпеня 2014 году суд Бабруйскага раёну пакараў Аляксея Мілюкова трыма гадамі абмежаваньня волі з адбыцьцём пакараньня ў папраўчай калёніі адкрытага тыпу за «гвалт або пагрозу ўжываньня гвалту ў дачыненьні да супрацоўніка органаў унутраных спраў», а таксама нанясеньні маральнай і фізычнай шкоды супрацоўніку ДАІ". У верасьні 2016 году Наваполацкі суд зьмяніў меру пакараньня і асудзіў Мілюкова паводле артыкулу 415 Крымінальнага кодэксу нібыта за ўхіленьне ад адбыцьця пакараньня ў выглядзе абмежаваньня волі, пасьля чаго яго накіравалі ў Горацкую калёнію.
Патрабаваў паважлівага стаўленьня — выносілі спагнаньні
Сваёй віны Аляксей не прызнаў. Арышт зьвязвае зь дзейнасьцю свайго бацькі Алега Жалнова, які выкрывае правапарушэньні супрацоўнікаў міліцыі. Паводле Мілюкова ў зьняволеньні ён спазнаў ціск і з боку прадстаўнікоў адміністрацыі папраўчых установаў, і з боку асуджаных, якія супрацоўнічалі з кіраўніцтвам вязьніц.
«У бальшыні супрацоўнікаў няма ні гонару, ні годнасьці, — заявіў журналістам Аляксей, толькі выйшаўшы на свабоду. — Што ім кажуць, тое яны і робяць. Фальсыфікуюць дакумэнты, у судах даюць ілжывыя паказаньні. У гэтай калёніі паважлівага стаўленьня да асуджаных няма. Я патрабаваў да сябе такога стаўленьня і праз гэта цярпеў».
Аляксей Мілюкоў з жонкай Сьвятланай. Пабраліся шлюбам за месяц да зьняволеньня. Аляксей узяў жончына прозьвішча.
У Горацкую калёнію Мілюкоў прыбыў 30 сьнежня 2016 году. Прабыў 295 дзён, зь іх 286 яго трымалі ў памяшканьні камэрнага тыпу і штрафным ізалятары. Паводле Аляксея яму не давалі азнаёміцца з дакумэнтамі, якія афармлялі за нібыта учыненыя ім правапарушэньні. Ён спадзяецца, што яны захаваліся ў Горацкім судзе. Перад вызваленьнем у Аляксея зьніклі запісы, якія ён рабіў падчас разгляду спраў.
Адкрыта не казалі, што я палітычны, але гэта адчувалася
«Як толькі я прыбыў, мяне прымушалі мыць прыбіральні, каб зьняважыць. Гэта не прынята рабіць у такіх месцах, бо ёсьць людзі з пэўных статусам, якія выконваюць такую працу. Калі перавялі ў камэру, то прызначалі спагнаньні за нібыта сон, за не прыборку, — казаў вызвалены актывіст. — Каралі перад прыездам адваката альбо за тое, што я адпраўляў заяву пра парушэньне маіх правоў у адміністрацыю. За гэта адпраўлялі ў карцэр».
«Мяне спрабавалі зламаць. Уся гэтая сыстэма, можна сказаць, змагалася са мною адным, — працягваў Мілюкоў. — Правакавалі мяне на фізычныя дзеяньні супраць іншых асуджаных. Асуджаным загадалі са мною не гаварыць. Зьняволеныя самі ў мяне выпытвалі, чаму са мною нельга гаварыць. Усім тым, хто наважыўся са мною загаварыць, пазьней выносілі дысцыплінарныя спагнаньні».
Аляксей Мілюкоў з маці Яўгеніяй. Пабачыўшы сына, Яўгенія залямантавала: «Што яны там з табою зрабілі»
«Незадоўга да вызваленьня, абсалютна незнаёмыя мне людзі пагражалі сэксуальным гвалтам праз тое, што я палітычны. Яны давалі зразумець, што зь мяне будуць зьдзекавацца. Зразумела, што адкрыта мне ніхто не казаў, што я палітычны, але па стаўленьні да мяне гэта адчувалася», — перакананы вызвалены актывіст.
«Буду жыць з жонкай спакойна і шчасьліва»
За час адбыцьця пакараньня Аляксей схуднеў на трыццаць кіляграмаў. Паводле яго ў калёніі ежа якасная, але яе мала. Некалькі разоў на знак пратэсту ён абвяшчаў галадоўкі.
«Я тры разы абвяшчаў галадоўкі, калі сядзеў у ШЫЗА. Першы раз дзесяць дзён галадаў, другі — пяць, апошні — шэсьць. Спыняў галадоўкі, бо не было сэнсу працягваць іх па вызваленьні з карцэру, — тлумачыў журналістам Мілюкоў.
Паплечнікі сустрэлі Аляксея Мілюкова з кветкамі
На 12 месяцаў за Аляксеем Мілюковым устаноўлены прэвэнтыўны нагляд. На пытаньне, што будзе ён рабіць на свабодзе, адказаў: «Жыць з жонкай спакойна і шчасьліва».
Сустракаць Аляксея прыехала жонка Сьвятлана, бацькі Яўгенія і Алег Жалновы, а таксама паплечнікі па партыі і прафсаюзу. Вызваленьня чакалі больш за сем гадзінаў.
Маці і жонка пачалі здымаць з сына турэмную робу
Інцыдэнт, які стаўся нагодай для крымінальнай справы супраць Аляксея Жалнова, здарыўся 4 верасьня 2013 году. Жалноў-старэйшы ўбачыў машыну, прыпаркаваную, як ён цьвердзіць, з парушэньнем правілаў дарожнага руху ля бабруйскага ДАІ, і пачаў здымаць факт парушэньня на відэа. Потым зьвярнуўся з вуснай скаргай да міліцыянтаў. Тыя, у сваю чаргу, зьвінавацілі Жалнова-старэйшага ў тым, што ён перашкаджае ім выконваць свае абавязкі. У выніку абодвух Жалновых гвалтам зацягнулі ў міліцэйскі будынак.
У студзені 2014 году супраць Аляксея Жалнова завялі крымінальную справу паводле артыкулу «Гвалт альбо пагроза ўжываньня гвалту ў дачыненьні да супрацоўніка органаў унутраных спраў». З пазовам зьвярнуўся капітан міліцыі Аляксандар Бутоўскі. Паводле матэрыялаў справы, Мілюкоў ударыў міліцыянта па галаве, зрабіўшы яму страсеньне мозгу. /a/25462359.html