МЗС Беларусі абвінаваціў Польшчу ў спробе завэрбаваць беларускага дыплямата ў Малдове

11 сьнежня МЗС Беларусі заявіла, што ўручыла афіцыйную ноту часоваму паверанаму ў справах Польшчы ў Беларусі Кшыштафу Ажанну, паведамляе БелТА.

Сьцьвярджаецца, што ноту пратэсту дыплямату ўручылі ў сувязі зь нібыта спробай польскіх спэцслужбаў «завэрбаваць беларускага дыплямата ў Малдове».

Прэс-сакратар МЗС Беларусі Анатоль Глаз заявіў, што МЗС таксама думае над «шэрагам іншых крокаў» у адказ на гэты «абуральны інцыдэнт».

Паводле БелТА, Кшыштаф Ажанна адказаў на пытаньні дзяржаўных журналістаў наступным чынам: «Я перадам тое, аб чым мы сёньня гаварылі, у Варшаву».

Учора на дзяржаўнай тэлевізіі выйшаў чарговы прапагандысцкі фільм, у якім заявілі, што Польшча нібыта спрабавала ў Кішынёве завэрбаваць беларускага дыплямата. Сьцьвярджалася, што дыплямат адмовіўся ад супрацоўніцтва і нават зрабіў аўдыё- і відэазапісы сустрэчы. Спробу вэрбаваньня нібыта правёў у Кішынёве польскі дыплямат Марцін Грабовіч, прапанаваўшы беларускаму калегу грошы за працу на спэцслужбы Польшчы.

ГЛЯДЗІЦЕ ТАКСАМА:

У Беларусі ўжо 19 іншаземцаў асудзілі за «агентурную дзейнасьць». Хто гэтыя людзі?